a trip to rotorua

rotorua liegt ungefähr drü outostunde in südlecher richtig entfährt vo auckland. distanz säuber betreit knap 250 kilimeter. muesch nid meine du chöntisch jufle und wärsch schnäuer dört wen d outobahn nimsch. nix outbahn. gmüetlech über d landstross. innerorts 50, userorts 80 und uf dr outobahn (dört wos eini het) 110 km/h. und gäu: immer schön links fahre!

jetz wo d tämperatur knap unter 20 grad isch muesch ja nid a strand. lieber jetz is landesinnere und wens de wärmer isch as meer. in rotorua säuber gits brachtisch unbegränzt vöu sache zum aluege und entdecke. wen gärn gfährlechi sportarte machsch chunsch do ou vou uf dini rächnig. auerdings hei mirs vorzoge bi däm herleche rägeschin eher gmüetlecheri sache z mache.

rotorua isch berühmt für sini heise quöuene. wöu die quöuene ou usem ärdinere chöme schmöcks ou ir ganze stadt nach schwäfu. das isch am afang chlei gwöhnigsbedürftig aber nach zwöi stunde merksch vo däm nütmeh. wie chönts ou anders si nachere stressige schuelwuche bruche mir arme studänte chlei erholig und drum si mer ou ines hot water spa go reläxe. verschidnigi bäder wo bis zu 42 grad warm si hei üs guet do.

e witeri atraktion in rotorua isch dr geisyr. ir ganze wäut gits nume drü orte wo me das naturspektaku cha bewundere. täglech um 10:15 sprütz waser bis zu zäh meter id höchi. sehr idrücklech si ou die verschidnige farbe wo s waser do het. wi inere märliwäut chunds eim vor.

jetz no e kulinarischi quiz frog: wo gits dr besti italiäner? rom, los angeles oder tokio? fausch! in rotorua. wenn zufäligerwis mou ir gägend bisch muesch unbedingt is NUVOLARI go ässe. http://www.nuvolari.co.nz/ es lohnt sech.